Подробнее

«Agar yozuvchining kitoblari barqaror va yaxshi sotilayotgan bo‘lsa, uning intervyu va so‘zboshi yozishiga hojat yo‘q, tanqidchilar nima deyishidan xavotirlanishga ham sabab yo‘q», degan edi britaniyalik mashhur yozuvchi, detektiv asarlar ustasi Jeyms Xedli Cheyz. Darhaqiqat, u faoliyatida mazkur so‘zlariga mos ravishda harakat qildi. Harakatlari samarasi o‘laroq yozuvchining ko‘plab asarlari - klassik detektiv qissalari hamda sarguzasht romanlari dunyo yuzini ko‘rdi va o‘quvchilar qalbidan joy oldi. Ayniqsa, uning 93ta detektiv romani ko‘plab tillarga o‘girildi va minglab tirajlarda sotildi. «Venetsiya missiyasi» muallifning ana shunday ko‘p va xo‘p sotilgan detektiv asarlaridan. Kitob mutolaasi davomida o‘quvchi qahramon bilan sarguzashtlarga boy mashaqqatli sayohatga otlanadi, dushmanlarga qarshi kurashishda uni qalban ko‘llab - quvvatlaydi, xatarli onlarda qayg‘uradi, kulgili sahnalarda ko‘ngil yozadi.